Díli, 26 de Maiu de 2026 – Sua Excelência Prezidente Tribunal de Recurso, Dr. Afonso Carmona, partisipa iha serimónia ho tema “Konsolidasaun entre Estadu no Akademia hodi Mantein Reziliente Dezenvolvimentu no Sustentabilidade ba Nasaun”, ne’ebé realiza iha Palásiu Prezidensiál, Salaun China, Díli.
Serimónia importante ida-ne’e hamutuk lideransa estadu, akademiku sira, estudante sira no konvidadu importante husi instituisaun oioin, atu diskute no reforça papel kolaborasaun entre Estadu no setor akademiku hodi promove dezenvolvimentu sustentável no reziliente ba Timor-Leste.
Partisipa mós iha eventu refere mak Sua Excelência Tenente Jeneral Lere Anan Timur, Prof. Dr. Joviano António da Costa, Reitor Universidade Nacional Timor Lorosa’e (UNTL), Sua Excelência Dr. Gastão Francisco de Sousa, Ministru Planeamentu no Investimentu Estratéjiku, Dr. Alexandre Xavier Araújo, Assesor Prinsipal, estudante sira no konvidadu sira seluk.
Iha abertura serimónia, Sua Excelência Prezidente da República, Dr. José Ramos-Horta, hato’o diskursu abertura ne’ebé subliña importánsia unidade entre governasaun, instituisaun akademika no sosiedade hodi garante progresu sustentável no fortalecimentu kapasidade nasional atu hasoru desafiu sira iha futuru.
Partisipasaun Sua Excelência Prezidente Tribunal de Recurso iha serimónia ida-ne’e reflete kompromisu Tribunal de Recurso atu kontinua apoia inisiativa sira ne’ebé promove kooperasaun interinstitusional, dezenvolvimentu rekursu umanu no fortalecimentu fundasaun Estadu de Direitu Demokrátiku iha Timor-Leste.