Díli, 01 Juñu 2026 – Tribunal de Recurso, liu husi autorizasaun Sua Exelénsia Presidente Tribunal de Recurso, Dr. Afonso Carmona, ofisialmente halo abertura ba formasaun ho tema “Estratégias de Gestão e Capacitação de Recursos Humanos no Contexto da Instalação do Supremo Tribunal de Justiça”, ne’ebé realiza iha Edifísiu Supremo Tribunal de Justiça, Colmera, Díli.
Atividade formasaun ida-ne’e organiza ho objetivu atu reforsa kapasidade institusional no prepara rekursu umanu sira ba prosesu instalasaun Supremo Tribunal de Justiça iha futuru, atu garante servisu judisiáriu ne’ebé efisiente no profissional.
Serimónia abertura ne’e partisipa husi Sua Exelénsia Presidente Tribunal de Recurso, Dr. Afonso Carmona, Sua Exelénsia Presidente Comissão da Função Pública, Sr. Agostinho Letêncio de Deus, Diretor-Geral Tribunal de Recurso, Diretores Nasionais, Xefes Departamentu, no formandu sira husi Tribunal de Recurso.
Iha introdusaun badak, Diretor-Geral Tribunal de Recurso hatete katak formasaun ida-ne’e importante tebes atu prepara rekursu umanu sira ba instalasaun Supremo Tribunal de Justiça. Nia mos refere katak atividade ne’e realiza tuir orientasaun no autorizasaun husi Sua Exelénsia Presidente Tribunal de Recurso, ho objetivu atu aumenta kompeténsia profissional funsionáriu sira.
Iha diskursu husi Sua Exelénsia Presidente Tribunal de Recurso, Dr. Afonso Carmona, husu ba partisipante sira atu tuir formasaun ne’e ho seriedade no responsabilidade. hato’o mos apresiasaun ba komisaun organizadora no parte hotu ne’ebé kontribui ona ba realizasaun atividade refere.
Dr. Carmona enkoraja funsionáriu kontratadu sira atu aproveita oportunidade ida-ne’e ho máximu, tanba formasaun hanesan ne’e sei kontribui ba dezenvolvimentu kapasidade individual no institusional. Liu husi aprendizajen kontínua no dedikasaun iha servisu, ema ida bele hakat husi nível simples ba nível ne’ebé aas no susesu.
Tuir mai, iha aprezentasaun matéria, Sua Excelénsia Presidente Comissão da Função Pública, Sr. Agostinho Letêncio de Deus, enfatiza importánsia preparasaun rekursu umanu ba futuru . Nia hatete katak funsionáriu públiku sira presiza planeia no prepara an husi agora atu hatene di’ak sira-nia papel no responsabilidade iha tinan lima oin mai.
Nia esplika katak Comissão da Função Pública atualmente halo ona diagnóstiku ba situasaun rekursu umanu iha instituisaun sira, inklui aspetu relasionadu ho kontratu sira, kontratu a termu sertu, estrutura remunerasaun no kritériu administrativu sira ne’ebé regula jestaun funsionáriu públiku.
Tuir Sr. Agostinho Letêncio de Deus, maioria funsionáriu públiku sira simu ona reajustamentu ka rasionalizasaun saláriu tuir dispozisaun Decreto-Lei Nú. 3/2026, ne’ebé regula matéria remunerasaun iha Administrasaun Públika. Iha oportunidade ne’e, halo mos sosializasaun kona-ba implementasaun kontratu a termu sertu tuir previzaun sira ne’ebé estabelese iha Decreto-Lei refere.
Atividade formasaun ida-ne’e hanesan parte husi esforsu Tribunal de Recurso no entidade relevante sira atu prepara rekursu umanu ne’ebé kualifikadu, profesional no prontu atu responde ba nesesidade institusionál sira iha kontekstu instalasaun Supremo Tribunal de Justiça iha Timor-Leste.