Prezidente Tribunal de Recurso no Juízes Conselheiros Partisipa iha “The Consolidated Sustainable Financial Audit Reforms in Timor-Leste: Lessons Learned Workshop”

Iha loron 28 fulan Maio tinan 2026, Sua Exelénsia Prezidente Tribunal de Recurso no Juízes Conselheiros Tribunal de Recurso partisipa iha atividade “The Consolidated Sustainable Financial Audit Reforms in Timor-Leste: Lessons Learned Workshop”, ne’ebé realiza iha Hotel Timor, Díli.

Atividade refere organiza husi Câmara de Contas ho apoiu husi Asian Development Bank (ADB), International Development Initiative (IDI), no Governu Japão, ho objetivu atu diskute no partilla lisaun sira ne’ebé hetan durante implementasaun reforma auditoria financeira sustentável iha Timor-Leste, no mos atu hametin instituisaun sira ne’ebé responsabiliza ba fiskalizasaun no supervisaun finansas públikas.

Iha oportunidade ne’e, Câmara de Contas halo lansamentu ofisiál ba Manual de Auditoria Finanseira ida ne’ebé sei sai hanesan matadalan importante ida hodi garante implementasaun auditoria ne’ebé profissional, transparente, responsável no tuir padraun internasionál sira.

Workshop refere mos inklui painel diskusaun ida ho tema “Working Together for Stronger Institutions: Coordinated Support for Public Financial Oversight in Timor-Leste”, ne’ebé fó oportunidade ba parseiru dezenvolvimentu sira atu partilla sira-nia esperiénsia, kontribuisaun no vizsaun kona-ba importánsia apoiu koordenadu ba reforsu instituisaun públika sira iha Timor-Leste. Painel diskusaun refere hetan partisipasaun husi Sra. Valeria Sperandeo husi Uniaun Europeia, Sra. Cipriana Teresa Tita de Jesus e Sousa husi World Bank, Sr. Karma Tenzin husi IDI, no modera husi Sr. Mark Robis husi ADB.

Iha diskursu, Sua Exelénsia Prezidente Tribunal de Recurso hato’o apresiasaun aas ba elaborasaun Manual de Auditoria Finanseira  refere, ne’ebé konsidera hanesan instrumentu importante ida atu garante estabilidade, transparénsia no responsabilidade iha gestão financeira públika.

Sua Exelénsia mos hato’o agradese ba apoiu husi Governu Japão, IDI no ADB,ne’ebé kontribui ba finalizasaun Manual de Auditoria  Finanseira refere. Manual ida ne’e konsege konklui liu husi prosesu elaborasaun, revisaun no análize husi espesialista IDI sira no mos ho kontribuisaun husi Juízes Conselheiros sira.Tuir Sua Exelénsia, existénsia Manual de Auditoria Finanseira ida ne’e sei fó kontribuisaun importante atu hametin sistema Jestaun finanseira ne’ebé transparente, efisiente no responsável, no mos atu aumenta kredibilidade instituisaun sira iha área fiskalizasaun finansas públikas.

Existensia Manual de Auditoria  Finanseira ida ne’e sei fó kontribuisaun importante ida atu hametin Jestaun finanseira ne’ebé transparente no responsável.Sua Exelénsia  hato’o parabéns no deseja sucessu ba Auditoria Câmara de Contas iha implementasaun tarefas no responsabilidades sira iha futuru.