Iha loron 26 fulan Maiu 2026, reprezentante Tribunal de Recurso, Diretor-Geral Sr. Cipriano Sarmento da Costa Lopes, partisipa iha serimónia selebrasaun Aniversáriu Provedoria dos Direitos Humanos e Justiça (PDHJ) ba dala 22, ne’ebé ao mesmo tempo marka mos lansamentu relatóriu PDHJ nian. Serimónia refere realiza iha Edifísiu CNE, Dili.
Selebrasaun aniversáriu ida-ne’e lori tema: “PDHJ Forte tuir Ordem Konstitusional: Timor-Leste ida ne’ebé respeita no proteje Direitus Umanos ho servisu públiku ne’ebé justu no efetivu.” Tema ne’e reflete komitmentu PDHJ atu kontinua hametin no reforsa papel instituisaun nian tuir ordem konstitusional, liu husi protesaun no garantia Direitus Umanos ba sidadaun sira iha Timor-Leste.
Liu husi aniversáriu ida-ne’e, PDHJ hakarak reafirma nafatin nia papel hanesan instituisaun independente ida ne’ebé iha responsabilidade atu proteje Direitus sidadaun sira nian, asegura servisu públiku ne’ebé justu no efetivu, no promove prinsípiu Estadu de Direitu Demokratiku tuir Konstituisaun República Demokrátika Timor-Leste.
Serimónia ne’e partisipa husi reprezentante instituisaun estadu sira, parseiru nasional no internasional, no konvidadu sira seluk, ho objetivu atu hametin kooperasaun no servisu hamutuk iha esforsu promove no proteje Direitus Umanos iha Timor-Leste.