Balide, 17 Julho 2026 – Sua Exelénsia Prezidente Tribunal de Recurso, Dr. Afonso Carmona, partisipa iha serimónia selebrasaun aniversáriu Centro Nacional Chega! (CNC, I.P.) ba dala 9, ne’ebé lori tema “Husi Memória ba Esperansa”. Serimónia ne’e realiza iha edifísiu istórikuAntigu Komarka Balide, Dili.

Selebrasaun ne’e kompostu husi atividade oioin, hanesan selebrasaun missa agradesimentu, exibisaun dokumentál Chega, Tinan-9, lansamentu Relatóriu Anuál 2025, lansamentu Relatóriu Peskiza Avaliasaun Impaktu Processu Rekonsiliasaun Komunitária 2002–2004, lansamentu vídeo “Apoiu Uma Memória ba Esperansa ba Sobrevivente sira”, no remata ho serimónia kua ke’ek no loke sampaña.

Serimónia ne’e hetan partisipasaun husi reprezentante Sua Exelénsia Primeiru-Ministru Kay Rala Xanana Gusmão Sua Exelénsia Segundu Vice-Primeiru-Ministru Eng. Mariano Assanami Sabino Lopes, Sua Exelénsia Prezidente Tribunal de Recurso Dr. Afonso Carmona, Sekretáriu Estadu Arte no Kultura Sr. Jorge Soares Cristóvão, Provedór Provedoria Direitus Umanus no Justisa (PDHJ), Prezidente no membru sira husi Konsellu Administrasaun CNC, I.P., Prezidente Autoridade Munisípiu Manufahi no Covalima, no parseiru sira husi nivel nasionál no internasionál.

Iha  intervensaun, Diretór Ezekutivu CNC, I.P., Sr. Hugo Maria Fernandes, hateten katak selebrasaun aniversáriu ba dala 9 la’ós de’it marka tempu ida, maibé mos reafirma kompromisu instituisaun nian atu kontinua hametin verdade, memória no rekonsiliasaun ba povu Timor-Leste.

“Iha aniversáriu ba dala 9 ne’e, ami promete katak vítima ida mos sei la lao mesak hodi lori todan istória nian iha ninia kabas. Tamba bainhira harii Centro Nacional Chega!, ami halo juramentu solene ida ba nasaun ida ne’e, katak ‘Memória ba Esperansa’. Selebra aniversáriu ba dala 9 nudar tempu foun ida atu kontinua hametin ami nia kompromisu. Ami sei rona, ami sei rai, no ami sei fahe imi nia memória sira atu jerasaun sira tuir mai labele haluha imi nia terus, imi nia halerik no imi nia esperansa sira,” dehan Diretór Ezekutivu CNC, I.P.

Liu husi partisipasaun iha serimónia ne’e, Tribunal de Recurso kontinua hatudu ninia apoiu ba inisiativa sira ne’ebé promove memória históriku, justisa, rekonsiliasaun no hametin Estadu de Direitu Demokrátiku iha Timor-Leste.