Manufahi, 17 Julho 2026 – Sua Exelência Juiz Conselheiro Dr. Duarte Tilman Soares partisipa iha konvite ofisial hanesan oradór iha Workshop Nasional Konsellu Siguransa Munisipál (KSM) ne’ebé realiza iha Munisípiu Manufahi.
Workshop Nasional ne’e lori tema “Hametin Polísia Komunitária no Konsellu Siguransa Munisipál (KSM) hodi Hari Munisípiu Manufahi ne’ebé Seguru, Dame no Hametin Kooperasaun entre Governu, PNTL no Komunidade.”
Iha sesaun aprezentasaun, Juiz Conselheiro Dr. Duarte Tilman Soares hato’o matéria ho títulu “Papel Justisa iha Konflitu Komunitáriu.”
Iha nia aprezentasaun, esplika katak instituisaun justisa iha papel importante atu asegura katak konflitu komunitáriu sira bele rezolve tuir lei, ho imparsialidade no respeitu ba direitus umanus. enfatiza katak servisu hamutuk entre Tribunál, Ministériu Públiku, PNTL, Governu, autoridade lokál, lideransa komunitária no komunidade importante tebes atu prevene konflitu, hametin kultura dame no estabilidade sosial, no garante seguransa ba sidadaun sira.
Workshop ida ne’e hetan mos partisipasaun husi Segundu Komandante Jerál PNTL, Komisária Assistente Polísia Natércia Eufrásia Soares Martins, Prezidenti Autoridade Munisipál (PAM) Manufahi, autoridade administrativu sira, lideransa PNTL, membru Konsellu Siguransa Munisipál (KSM), lider komunitáriu no reprezentante husi instituisaun relevante sira.
Realizasaun workshop ne’e reflete komitmentu hamutuk husi Governu, PNTL, instituisaun justisa no parseiru relevante sira atu hametin Polísia Komunitária, reforça papel Konsellu Siguransa Munisipál (KSM), no promove kooperasaun interinstitusionál hodi hari Munisípiu Manufahi ne’ebé seguru, dame no iha estabilidade ba benefísiu komunidade tomak.