Viqueque, 11 Agostu 2026 — Sua Exelénsia Prezidente Tribunal de Rekursu, Dr. Afonso Carmona,halo kolokasaun fatuk dahuluk ba Projetu Konstrusaun Edifísiu Tribunal Judisiál Primeira Instánsia Viqueque (TJPI-Viqueque) no Rezidénsia Juís sira, iha Munisípiu Viqueque
Sua Exelénsia Prezidente Tribunal de Rekursu salienta katak dezenvolvimentu nasaun tenke la’o hamutuk ho dezenvolvimentu iha setór justisa,liu hosi kolaborasaun entre instituisaun sira ne’ebé halo parte iha sistema justisa, hanesan Ministériu Públiku, Defensória Públika no entidade relevante sira seluk.
Nia subliña katak konstrusaun TJPI-Viqueque ne’e sei lori dezenvolvimentu ba povu Viqueque, liuliu tanba sei hakbesik servisu justisa ba komunidade. Ho infraestrutura judisiál ne’ebé di’ak no adekuadu, povu Viqueque sei bele asesu ba servisu justisa ho lalais, fasil no besik liu.
Sua Exelénsia mos hato’o apelu ba kompanhia ne’ebé manán tender no asina ona kontratu ho Tribunal de Rekursu atu hala’o konstrusaun ne’e ho responsabilidade, tuir termu no kondisaun kontratu. Nia mos husu ba autoridade munisipál no instituisaun relevante sira atu fó apoiu no kolaborasaun di’ak durante prosesu konstrusaun, hodi asegura projetu ne’e bele lao ho di’ak no tuir planeamentu.
Iha sorin seluk, Diretór-Jerál Tribunal de Rekursu, Cipriano Sarmento da Costa Lopes, hateten katak Projetu Konstrusaun Tribunal Judisiál Primeira Instánsia Viqueque, ne’ebé inklui mos rezidénsia ba juís sira, iha signifikadu boot ba Tribunal de Rekursu.
Tuir nia, serimónia kolokasaun fatuk dahuluk ne’e marka etapa importante ida iha esforsu Tribunal de Rekursu atu hadi’a no dezenvolve infraestrutura judisiál ho kualidade iha territóriu Timor-Leste tomak. Edifísiu ne’e sei sai infraestrutura importante ida atu hakbesik servisu judisiál ba povu no fasilita asesu komunidade ba justisa.
Iha oportunidade ne’ebé hanesan, Komandante PNTL Munisípiu Viqueque mos hato’o apoiu ba projetu ne’e. Nia agradese ba Tribunal de Rekursu tanba inisiativa atu hari TJPI-Viqueque, ne’ebé sei fasilita liután kooperasaun entre PNTL no Tribunal, liuliu tanba servisu sira sei besik no fasil liu ba malu.
Nia salienta katak PNTL Munisípiu Viqueque prontu atu fó apoiu no kolabora iha prosesu dezenvolvimentu ne’e, liuliu iha aspetu sira ne’ebé relasiona ho servisu no seguransa.
Enkuantu ne’e, Prezidente Autoridade Munisípiu Viqueque hato’o apresiasaun no agradese ba Sua Excelénsia Prezidente Tribunal de Rekursu tanba kooperasaun ho autoridade lokál no povu Viqueque liu hosi konstrusaun TJPI-Viqueque.
Nia hateten katak prezensa tribunal iha Viqueque sei lori benefísiu boot ba komunidade, tanba povu sei bele asesu ba servisu justisa ho fasil no besik liu. Nia mos subliña katak infraestrutura judisiál foun ne’e sei kontribui ba dezenvolvimentu Munisípiu Viqueque.
Antes de hahú konstrusaun, serimónia ne’e mos hetan autorizasaun hosi lia-na’in sira, ne’ebé hala’o ritual kultura tradisionál ba rai no husu lisensa ba rai ne’ebé sei uza atu harii edifísiu TJPI-Viqueque. Ritual ne’e hanesan forma respeitu ba kultura no tradisaun lokál, ho esperansa atu hetan “matak-malirin” no bensaun hosi rai ba konstrusaun ne’e.
Iha momentu kolokasaun fatuk dahuluk, Amu Parókia Viqueque mos fó bensaun ba fatin ne’ebé sei uza ba konstrusaun edifísiu foun, inklui ba materiál sira ne’ebé prepara ona ba prosesu konstrusaun.
Serimónia ne’e hetan partisipasaun hosi Komandante PNTL Munisípiu Viqueque,Juiz-Secretáriu ba Conselho Superior da Magistratura Judicial, Dr. Yudi Pamukas,no membro CSMJ, DiretórTerras no Propriedades, reprezentante Agência de Desenvolvimento Nacional (ADN), entidade relevante sira iha setór justisa, reprezentante komunidade, xefe Suku Caravela, no konvidadu sira seluk.
Serimónia ne’e remata ho foto hamutuk entre Sua Excelénsia Prezidente Tribunal de Rekursu, Diretór-Jerál Tribunal de Rekursu, autoridade munisipál, Komandante PNTL, lia-na’in sira, reprezentante instituisaun relevante, komunidade no partisipante sira hotu.