Baucau, 10 Agostu 2026 — Sua Exelénsia Prezidente Tribunal de Rekursu, Dr. Afonso Carmona,halo lansamentu primeira pedra ba projetu konstrusaun Edifísiu Tribunal Judisiál Primeira Instánsia Baucau no Rezidénsia Juís sira, ne’ebé hala’o iha Munisípiu Baucau.

Iha nia intervensaun, Sua Exelénsia Prezidente Tribunal de Rekursu salienta katak dezenvolvimentu nasaun tenke la’o hamutuk ho dezenvolvimentu iha setór justisa, liu hosi kolaborasaun entre instituisaun sira hotu ne’ebé iha responsabilidade iha área justisa, hanesan Ministériu Públiku, Defensória Públika no entidade relevante sira seluk.

Nia subliña katak konstrusaun edifísiu foun ne’e sei lori dezenvolvimentu ba povu Baucau, tanba sei fasilita no hakbesik asesu komunidade ba servisu justisa. Ho infraestrutura ne’ebé di’ak no adekuadu, sidadaun sira bele hetan asesu ba servisu judisiál ho lalais, fasil no besik liu.

Iha oportunidade ne’ebé hanesan, Sua Exelénsia mos husu ba kompana ne’ebé asina ona kontratu atu hala’o konstrusaun, atu kumpre ho responsabilidade padraun sira ne’ebé estabelese iha kontratu. Nia mos husu ba Komandante Munisípiu Baucau atu kolabora di’ak ho kompanñia durante prosesu konstrusaun, hodi asegura katak projetu ne’e bele hala’o ho di’ak, seguru no tuir planeamentu.

Iha sorin seluk, Diretór-Jerál Tribunal de Rekursu, Cipriano Sarmento da Costa Lopes, hateten katak projetu konstrusaun Tribunal Judisiál Primeira Instánsia Baucau, ne’ebé inklui mos rezidénsia ba juís sira, iha signifikadu boot ba Tribunal de Rekursu.

Tuir nia, serimónia lansamentu primeira pedra ne’e marka etapa importante ida iha esforsu Tribunal de Rekursu atu dezenvolve no hadi’a infraestrutura judisiál ho kualidade, la’ós de’it iha Baucau, maibé mos iha territóriu Timor-Leste tomak.

Nia hateten katak edifísiu foun ne’e sei sai infraestrutura importante ida atu hakbesik servisu justisa ba povu, hodi nune’e komunidade sira bele asesu ba servisu judisiál ho lalais, fasil no efisiente.

Serimónia lansamentu primeira pedra ne’e mos hetan bensaun hosi Amu Parókia Baucau. Bensaun ne’e fó ba rai no fatin ne’ebé sei uza ba konstrusaun edifísiu foun, inklui mos ekipamentus sira ne’ebé prepara ona ba prosesu konstrusaun.

Serimónia ne’e hetan partisipasaun hosi PGR,Dr. Nelson de Carvalho, Juiz-Secretáriu ba Conselho Superior da Magistratura Judicial,Dr. Yudi Pamukas

Komandante PNTL Munisípiu Baucau, Membro conslho Superior Majislatura Judicial (CSMJ)DiretórTerras no Propriedades, representante hosi Agência de Desenvolvimento Nacional (ADN), reprezentante sira hosi entidade relevante iha setór justisa, no reprezentante komunidade sira.

Projetu konstrusaun Tribunal Judisiál Primeira Instánsia Baucau no Rezidénsia Juís sira espera katak sei kontribui ba hadi’a qualidade servisu justisa no fasilita asesu povu ba justisa, liuliu ba komunidade iha Munisípiu Baucau no munisípiu sira iha sorin.

Serimónia ne’e taka ho foto hamutuk entre Sua Excelénsia Prezidente Tribunal de Rekursu, Diretór-Jerál Tribunal de Rekursu, reprezentante Ministériu Públiku, Komandante PNTL Munisípiu Baucau,Terras no Propriedades, ADN, entidade relevante sira iha setór justisa no reprezentante komunidade sira ne’ebé partisipa iha serimónia lansamentu primeira pedra.