Díli, 8 Agostu 2026 — Sua Exelénsia Presidente Tribunal de Recurso, Dr. Afonso Carmona, partisipa iha Serimónia Komemorasaun 59.º ASEAN Day, ne’ebé hala’o iha Conference Hall, Ministériu Negósius Estranjeirus no Kooperasaun (MNEC), Díli.
Serimónia ne’e marka momentu istóriku ba Timor-Leste, nu’udar estadu-membru plenus ASEAN, no reprezenta mós primeiru selebrasaun ASEAN Day husi Timor-Leste nu’udar membru plenus husi organizasaun rejionál.
Governu Repúblika Demokrátika Timor-Leste, hamutuk ho Embaixadas husi estadu-membru ASEAN sira ne’ebé rezide iha Díli, komemora 59.º ASEAN Day liu husi serimónia hasae bandeira ASEAN no selebrasaun ofisiál ne’ebé hala’o iha Ministériu Negósius Estranjeirus no Kooperasaun.
Iha abertura, Sua Exelénsia Ministru Negósius Estranjeirus no Kooperasaun, Bendito dos Santos Freitas, deskreve selebrasaun ne’e nu’udar Marka istóriku ida iha polítika estranjeira Timor-Leste. Nia reafirma kompromisu inabalável Timor-Leste ba Karta ASEAN, ne’ebé la’ós de’it reflete identidade Timor-Leste nu’udar parte integrante husi Sudeste Aziátiku, maibé mós hatudu kompromisu estratéjiku Nasaun nian ba integrasaun ekonómika no haforsa envolvimentu diplomátiku iha rejiaun.
Iha reprezentasaun husi Presidénsia ASEAN, Sua Exelénsia Mary Anne A. Padua, Embaixadora Repúblika Filipina iha Timor-Leste, hato’o parabéns ba Timor-Leste tanba selebra primeiru ASEAN Day nu’udar estadu-membru plenus. Nia mós hato’o apresiasaun ba perseveransa Timor-Leste no prontidaun país nian atu kontribui ho maneira signifikativu ba komunidade ASEAN.
Iha intervensaun prinsipál iha serimónia, Sua Exelénsia Vice-Primeiru-Ministru no Ministru Koordenadór Asuntu Ekonómiku, Francisco Kalbuadi Lay, reafirma kompromisu Governu Timor-Leste atu aproveita membru ASEAN hodi promove páz, kooperasaun rejionál, komérsiu, investimentu no dezenvolvimentu sustentável, no iha tempu hanesan kria oportunidade liu tán ba povu Timor-Leste.
Nu’udar estadu-membru foun liu iha ASEAN, Timor-Leste kontinua komprometidu atu aprofunda nia envolvimentu iha pilar tolu Komunidade ASEAN, no kontinua mós preparasaun sira atu asume, ho susesu, Presidénsia ASEAN iha tinan 2029. Kompromisu ne’e reflete determinasaun Timor-Leste atu kontribui ba ASEAN ne’ebé forte liután, reziliente no orientadu ba interese no bem-estar ema hotu.
Serimónia 59.º ASEAN Day ne’e partisipa husi Sua Exelénsia Presidente Tribunal de Recurso, Dr. Afonso Carmona; Sua Exelénsia Vice-Primeiru-Ministru no Ministru Koordenadór Asuntu Ekonómiku, Francisco Kalbuadi Lay; Sua Exelénsia Ministru Negósius Estranjeirus no Kooperasaun, Bendito dos Santos Freitas; Xefe Estadu-Maior Jeral F-FDTL, Tenente-General Falur Rate Laek; Vice-Ministra ba Asuntu ASEAN, Milena Rangel; membru Governu; Embaixadór no reprezentante husi estadu-membru ASEAN; no membru husi korpu diplomátiku sira.