Díli – Sua Exelénsia Presidente Tribunal de Recurso, Dr. Afonso Carmona, partisipa iha Simpóziu Nasionál ne’ebé organiza husi Konferénsia Episkopal Timorense (KET) ho tema “Moris Tuir Valór Evangéliku iha Moris Polítika, Sosial no Ekonómika.” Atividade ne’e realiza iha Salaun Multiuzu GMN, Dili.
Iha simpóziu ida ne’e, realiza mós sesaun konferénsia no diskuzaun ho oradór prinsipál sira. Entre sira, destaca liu Cardeal Peter Kodwo Appiah Turkson, ne’ebé atualmente hala’o knaar nu’udar Konselleiru ba Pontifísia Akademia Siénsia, Vatikanu. Iha nia aprezentasaun, Cardeal Turkson hateten katak valór evanjéliku tenke sai hanesan baze importante ida atu orienta desizaun no hahalok iha área polítika, sosial no ekonómika, hodi promove governasaun di’ak, justisa, solidariedade no respeitu ba dignidade ema hotu.
Iha abertura atividade ne’e, Prezidente Konferénsia Episkopal Timorense, Dom Virgílio do Carmo da Silva, hato’o liafuan agradesimentu ba Cardeal Peter Kodwo Appiah Turkson tanba nia disponibilidade no prezensa atu fahe hanoin no esperiénsia iha simpóziu nasionál ida ne’e. Dom Virgílio mos salienta katak tema ne’ebé diskute iha simpóziu ne’e importante tebes atu hametin konsiénsia no responsabilidade sidadaun sira, liuliu lideransa sira iha setor polítiku, sosial no ekonómiku.
Simpóziu nasionál ne’e hetan partisipasaun husi padre sira, madre sira, estudante sira no membru komunidade sira husi parte oioin, ne’ebé hotu-hotu partisipa ativamente iha prosesu aprendizagem no troka hanoin kona-ba implementasaun valór evanjéliku iha moris lorloron.
Partisipasaun S.E. Presidente Tribunal de Recurso, Dr. Afonso Carmona, iha atividade ida ne’e hatudu kompromisu instituisaun judisiál atu apoia inisiativa sira ne’ebé promove valór morál, étika, justisa no responsabilidade sosial, hanesan baze importante ba dezenvolvimentu nasaun no hametin Estadu de Direitu Demokrátiku iha Timor-Leste.