Díli, 18 Agostu 2026 — Sua Exelénsia Presidente Tribunal de Recurso, Dr. Afonso Carmona, hamutuk ho Juízes Administradores husi kada munisípiu, Auditores husi Câmara de Contas, Sekretáriu Judisiál, Diretor-Geral Tribunal de Recurso, Diretores Nasionais no Chefes Departamentu sira, partisipa iha Reuniaun Komité Revizaun Polítika (KRP) ba Preparasaun Orsamentu Jerál Estadu (OJE) 2027, ne’ebé hala’o iha Ministériu das Finanças Aitarak-Laran,Dili.
Reuniaun KRP ne’e nu’udar parte importante husi kalendáriu prosesu preparasaun OJE 2027, ne’ebé hahú iha loron 17 Agostu no sei remata iha loron 27 Agostu 2026. Prosesu ne’e iha objetivu atu fasilita diskusaun no toma desizaun final husi membru Komité Revizaun Polítika kona-ba alokasaun orsamentál no definisaun prioridade polítika foun ba períodu 2027–2031.
Partisipasaun husi reprezentante instituisaun sira iha reuniaun ne’e reflete importánsia koordenasaun interinstitusionál iha prosesu planeamentu no preparasaun orsamentu nasional. Liu husi mekanizmu KRP, prioridade no programa sira ne’ebé propoin sei haree no revizaun tuir orientasaun polítika no objetivu dezenvolvimentu nasional.
Preparasaun OJE 2027 mos marka mudansa importante iha métodu preparasaun orsamentu, tanba prosesu ne’e implementa iha enquadramentu orsamentál foun ne’ebé bazeia ba polítika. Mudansa ne’e nu’udar parte husi reforma iha área jestaun finansas públikas iha Timor-Leste, ho objetivu atu hametin ligasaun entre polítika governu, planeamentu, alokasaun rekursu no rezultadu ne’ebé atu atinji.
Iha prosesu tranzisaun ba sistema orsamentál foun ne’e, Primeiru-Ministru, Ministra Finanças no Diretor-Geral do Orçamento sira iha papel importante iha orientasaun no lideransa ba prosesu preparasaun OJE 2027, hodi asegura katak rekursu públiku aloka tuir prioridade no nesesidade nasional.
Sua Exelénsia Primeiru-Ministru Kay Rala Xanana Gusmão enfatiza katak rekursu públiku tenke jere ho responsabilidade, transparénsia no efisiénsia, no tenke diresiona ba programa sira ne’ebé planeia ho di’ak, ho orientasaun ba rezultadu no interese públiku.
Prosesu preparasaun OJE 2027 ne’e sai nu’udar parte husi esforsu atu kontinua dezenvolve sistema orsamentál ne’ebé previsível, disiplinadu, transparente no bazeia ba polítika, hodi garante katak rekursu públiku utiliza ho efetividade no fó kontribuisaun ba melloria servisu públiku no dezenvolvimentu nasional.
Partisipasaun Tribunal de Recurso iha reuniaun ida ne’e demonstra kompromisu instituisaun judisiária atu kontinua envolve iha mekanizmu planeamentu no jestaun rekursu públiku, tuir prinsipiu responsabilidade institusional no boa governasaun.