Iha loron 1 Setembru 2026, Sua Exelénsia Prezidente Tribunal de Recurso, Dr. Afonso Carmona, partisipa iha Aeroportu Internasionál Nicolau Lobato, Dili, hodi simu no fó onra ba restus mortais hosi preladu Timor-Leste nain haat, mak:
- Dom Jaime Garcia;
- Dom José Joaquim Ribeiro;
- Mons. Martinho da Costa Lopes; no
- Dom Alberto Ricardo da Silva.
Hafoin Resesaun restus mortais, S.E. Prezidente Tribunal de Recurso akompaña ba Tasi Tolu, fatin ne’ebé hala’o selebrasaun Misa Solene hodi fó omenajen no orasaun ba alma hosi Bispu na’in haat ne’ebé durante sira nia moris fó kontribuisaun boot ba Igreja Katólika no povu Timor-Leste.
S.E. Presidente Tribunal de Recurso partisipa iha eventu ne’e hanesan órgaun soberania ida, hamutuk ho membru Governu, padre, madre no reprezentante komunidade relijioza no sosiedade sivíl iha Dili.
Partisipasaun ne’e mos sai hanesan forma ida atu fó homenajen no rekoñesimentu ba sakrifísiu, servisu no luta hosi preladu sira ne’e ba rai doben Timor-Leste. Sira-nia moris, servisu pastoral no dedikasaun ba povu Timor-Leste sei nafatin sai parte importante hosi istória no memória kolektiva nasaun nian, liuliu iha prosesu luta ba dignidade, liberdade no independénsia Timor-Leste,
Atu nune’e, povu Timor-Leste kontinua fó onra no hatene valor ba sira-nia kontribuisaun, no rai nafatin sira-nia memória hanesan parte ida hosi istória Igreja no Nasaun Timor-Leste.