Iha loron 13 de Setembro de 2025, Sua Exelência Prezidente Tribunal de Recurso, Dr. Afonso Carmona, hamutuk ho Sua Exelência Primeiru-Ministru, Kay Rala Xanana Gusmão, prezide serimónia tomada de posse ba Juízes Estajiárius 12, ne’ebé hala’o iha Tribunal Judisiál Primeira Instánsia Dili.
Iha nia diskursu, Sua Excelência Primeiru-Ministru sublinha papel importante magistradu foun nian iha prosessu konstrusaun Estadu, ho enfázi katak dever profesiónál sei tenke hadia prioridade liu ba direitu individual, hodi garante justisa no igualdades ba sidadaun hotu.
Iha oportunidade ida-ne’e, Juiz Alfonsius Costa Akoyt, hanesan representante husi Juízes Estajiárius sira, hato’o nia agradesimentu ba instánsia relevante sira ne’ebé fo konfiansa ba magistradu foun sira. Nia hateten katak prosesu ida ne’e laós fácil, tanba magistradu sira presiza pasa quase tinan haat formasaun iha Timor-Leste, depois submete ba avaliasaun iha Portugal, no kontinua ho formasaun pratika durante fulan neen iha tribunal portugés. “Prosesu ida-ne’e la’ós fásil, maibé ho esforsu no determinasaun ami konsege hetan oportunidade atu simu tomada de posse hanesan Juiz Estajiáriu,” nia sublinha.
Serimónia solene ida-ne’e mos hatudu kompromisu Tribunal de Recurso hamutuk ho Governu Timor-Leste atu kontinua reforsa kapasidade institusionál sistema judisiáriu, no garante integrasaun magistradu foun sira hodi kontribui ba reforsu Estadu de Direitu Demokrátiku.