Iha loron 22 fulan Dezembru 2025, Sua Exelénsia Presidente Tribunal de Recurso, Dr. Afonso Carmona, partisipa iha selebrasaun “Natal ho Povo”, ne’ebé hala’o iha Palásiu Prezidensiál Nicolau Lobato, Dili.
“Natal ida ne’e fó domin mai ita hotu – ba Timor oan sira iha rai laran no rai liur”, sai hanesan momentu importante ida atu hametin sentidu fraternidade, solidariedade no unidade entre povu Timor-Leste nian.
Iha okaziaun ne’e, Sua Exelénsia Presidente da Repúblika Demokrátika de Timor-Leste, Dr. José Manuel Ramos-Horta, hato’o diskursu ida ne’ebé fó hakuak boot ba povu tomak, liu-liu ba komunidade sira ne’ebé hela iha kondisaun vulnerável. Iha nia mensajen, Prezidente da Repúblika subliña katak Natal la’ós de’it selebrasaun relijioza, maibé mos momentu ida atu hametin valor umanu sira, hanesan domin, paz no unidade nasional.
Programa “Natal ho Povo” sai nudar testamuña ida ba kompromisu Prezidénsia no Governu nian hodi promove unidade nasional, selebra kultura Timor-Leste nian, no fahe bensaun Natal nian direitamente ba sidadaun sira, nune’e bele hametin relasaun besik entre estadu no povu.
Partisipasaun Presidente Tribunal de Recurso iha atividade ida ne’e mos reflete kompromisu órgaun soberania judisiál nian hodi kontinua apoiu esforsu sira ne’ebé promove paz, koezáun sosial no bem estar ba povu Timor-Leste tomak.