DILI, 17 juñu 2021 (TATOLI)—Tribunál Distritál Dili (TDD), hahú halo atendimentu ba julgamentu prosesu-sira ho normál, iha sesta (18/06).
Juiz admnistradór TDD, Afonso Carmona, hateten implementasaun serka sanitária no konfinamentu domisiliáriu jerál iha Estadu emerjénsia, TDD atende de’it prosesu-sira ho karáter urjénsia hanesan pimeiru interrogatóriu, sumáriu, arguidu detidu, arguidu prezu, providénsia kautelár no prosesu kontinuasaun-sira atu asegura prova labele lakon.
“Tribunál sei hahú fila-fali atende julgamentu normál hahú aban, tanba ne’e sei hein mós despaixu Tribunál Rekursu (TR) liu hosi Konsellu Superiór,” Afonso Carmona, hateten ba jornalista Agência Tatoli, iha nia kna’ar fatin Mandarin, Dili, kinta ne’e.
Durante implementasaun konfinamentu domisialiáriu jerál, TDD rezolve prosesu krime no sivíl menus, haesan iha fulan maiu redúz de’it prosesu krime 30 hosi prosesu pendente no prosesu foun hamutuk 1.667, no iha abríl konsege redúz prosesu krime 104, hosi prosesu pendente no prosesu foun hamutuk 1.761
Tuir dadus ne’ebé Agência Tatoli asesu hosi TDD, númeru kazu krime pendente hosi fulan maiu hamutuk 1.657, inklui prosesu foun 10 ne’ebé foin rejista, nune’e númeru aumenta ba 1.667.
Hosi númeru ne’e, konsege finaliza prosesu hamutuk 30, no daudaun-ne’e, kazu pendente iha fulan maiu iha de’it 1.637.
Kona-bá prosesu sivíl, pendente iha fulan maiu hamutuk 866, no prosesu sivíl foun hamutuk ualu (8), nune’e kazu sivíl pendente aumenta ba 874.
Númeru ne’e, Tribunál konsege finaliza kazu sivíl hamutuk sanulu, no daudaun-ne’e kazu sivíl pendente hamutuk 864.
Tuir estatístika hosi TDD, tipu kazu krime ne’ebé rejista mak hanesan, ofensa integridade fízika, violénsia doméstika, korrupsaun ho sira-seluk no kazu sivíl mak hanesan problema rai, kontratu, regulasaun paternál no sira-seluk.
Jornalista: Nelson de Sousa