DILI, 26 maiu 2021 (TATOLI)—Prezidente Tribunál Rekursu (PTR), Deolindo dos Santos, ne’ebé lidera mós Tribunál Superiór Administrativu, Fiskál no konta liuhosi Kámara Konta, husu Parlamentu Nasionál liuhosi Komisaun C ne’ebé trata asuntu Finansa Públika, atu diskute kle’an proposta-lei enkuadramentu orsamentál.
“Husu ba Parlamentu Nasionál liuhosi Komisaun C ne’ebé trata asuntu Finansa Públika, atu diskute kle’an proposta-lei enkuadramentu orsamentál nune’e labele fó efeitu ba lei sira seluk,” Prezidente Tribunál Rekursu, fó hanoin ne’e liuhosi plenária, kuarta ne’e.
Tribunál Superiór Administrativu, Fiskál no konta liuhosi Kámara Konta ho kompeténsia kontrolu finansa públika, iha jurizdisaun no podér kontrolu finanseiru iha ámbitu orden jurídika RDTL.
Prezidente Tribunál Rekursu fó hanoin ne’e liuhosi audiénsia públika ho Komisaun C kona-ba apresiasaun inisiál ba proposta-lei númeru 27/3-Lei Enkuadramentu Orsamentál.
Nia dehan, Governu hanoin atu halo alterasaun ba diploma ne’e di’ak maibé labele hanoin de’it maibé tenke iha preparasaun tékniku ba operadór sira-ne’ebé implementa lei ne’e atubele fó resposta ida-ne’ebé ke di’ak bainhira lei ne’e vigora.
Tanba, tuir nia, presiza haree mós kona-ba kestaun rekursu umanu nune’e implementadór sira bele ezekuta implementasaun ho di’ak.
“Tuir Kámara Konta nia haree katak proposta-lei ne’e organiza ho forma ne’ebé di’ak atubele hadi’a di’ak liután buat ne’ebé ke agora daudaun ne’e iha, maibé importante mak ita tenke halo preparasaun tékniku nune’e bainhira proposta-lei ne’e aprovadu iha Parlamentu Nasionál no promulgadu hosi Prezidente Repúblika, tékniku sira bele implementa diploma ne’e ho di’ak iha istema jestaun finanseira públiku nian,” nia dehan.
Governu presiza halo preparasaun tékniku ho di’ak, tanba lei ne’e bele di’ak maibé to’o iha implementasaun ne’e rasik hasoru problema tanba tékniku sira la preparadu.
“Ida-ne’e importante tebes, ita bele haree hamutuk tanba ida-ne’e la’ós kestaun Parlamentu nian de’it maibé kestaun ita hotu nian. Parlamentu Nasionál, Governu no tribunal rasik, ita haree halo nusá mak bele kapasita tékniku sira atubele nune’e implementasaun ba diploma ka lei ne’e,” nia katak.
Iha apresiasaun inisiál ba proposta-lei númeru 27/3a-Lei Enkuadramentu Orsamentál ne’e organiza hosi Prezidente Komisaun C, Deputada Maria Angélica Rangel.
Jornalista: Evaristo Soares Martins