notícias

DILI, 27 janeiru 2021 –Ho situasaun COVID-19 ne’ebé daudaun mundu enfrenta, inklui Timor-Leste maka difikulta Tribunál Rekursu (TR) ho Governu Brazil atu asina akordu kooperasaun iha area justisa.

“Esforsu sira ne’ebé ita hala’o iha tinan rua liubá tenta ho esforsu tomak, maibé agora ita labele konkretiza ida ne’e tanba agora ho situasaun pandemia,” prezidente Tribunál Rekursu, Deolindo dos Santos, informa ba Agência TATOLI iha Parlamentu Nasionál, kuarta ne’e.

Antes ne’e prosesu refere to’o ona faze finál hodi asina akordu kooperasaun, maibé ho situasaun COVID-19 labele realiza, maske nune’e Deolindo dos Santos nafatin garante katak iha futuru sei realiza duni akordu kooperasaun entre parte rua.

Akordu kooperasaun ne’e Governu Brazil liuhosi Ajénsia Brazileira kooperasaun (ABC) ho CNJ sira sei apoiu para atu haree ba sistema informatizasaun prosesu sira iha tribunál sira nian oinsá atu lao ho di’ak.

Daudaun ne’e Tribunál iha ona sistema refere, maibé ladún atualizadu, tanba ne’e, ho meiu kooperasaun refere Timor-Leste sei hetan apoiu formasaun ba sistema ne’e ninia funsionamentu.

Jornalista : Nelson de Sousa

Editór : Francisco Simões