DILI, 27 janeiru 2021 –Rezultadu verifikasaun hosi Tribunál Rekursu (TR) ba partidu foun hanesan Patifor ho Partidu Dezenvolvimentu Sosiál (PDS) mós la prienxe rekizitu.
Deolindo dos Santos, esplika, tuir lei kada munisípiu, partidu ida tenke iha apoiante 1.000, maibé partidu sira ne’e kuaze iha munisípiu balun nia apoiante la to’o.
Tuir prosesu partidu foun sira ne’ebé atu halo pedidu inskrisaun primeiru ba uluk iha Ministériu Justisa liuhosi Diresaun Jerál Servisu Notariadu hafoin halo autentikasaun (verifikasaun) ba dokumentu.
“Iha semana ida liubá Tribunál Rekursu hasai ona desizaun ba Partidu Dezenvolvimentu Sosiál (PDS) ho Patifor mós seidauk kumpre rekizitu ida atu sai nu’udar partidu, nune’e notifika ona parte sira,” prezidente Tribunál Rekursu, Deolindo dos Santos, informa hodi responde Agência TATOLI iha Parlamentu Nasionál, kuarta ne’e.
Hafoin finaliza verifikasaun sei relata fila-fali ba Ministru Justisa hodi enkamiña ba Tribunál Rekursu (TR) tanba Tribunál Rekursu mak sei emite legalidade jurídika inskrisaun legál partidu foun.
Tuir lei partidu polítiku iha artigu 13 primeiru partidu foun sira tenke prienxe rekizitu hanesan iha apoiante 20.000, estatutu, manual programa, denominasaun, sigla partidu, bandeira, emblema, marxa (hinu) ho sira seluk.
Jornalista : Nelson de Sousa
Editór : Francisco Simões