DILI, 22 jullu 2020 (TATOLI) – Juiz Administradór Tribunál Distritál Díli (TDD), Afonso Carmona, fahe ona turnu ba juiz sira hodi atende julgamentu iha periodu feriadu judisiáriu, hahú hosi loron 1 agostu to’o loron 15 setembru 2020.
Afonso Carmona, esplika turnu kada loron ne’ebé sei aplika ba juiz hodi atende julgamentu urjénsia ba prosesu krime hanesan prosesu sumáriu, arguidu detidu, prezu no primeiru interrogatóriu.
“Oráriu iha tiha ona, entaun loro-loron juiz sira ne’ebé turnu sempre marka prezensa iha Tribunál ho ofisiais justisa ne’ebé ita destaka tiha ona hodi atende kazu sira ho karakter urjénsia nune’e sei la implika ba direitu arguidu no lezadu sira nian atu hetan justisa,” informa Afonso Carmona, ba jornalista, ohin, iha TDD.
Nia hateten, ba prosesu julgamentu kazu kontinuasaun ne’ebé karik marka ona iha loron durante ferias judisiáriu iha fleksibilidade bele la’o nafatin.
“Hanesan tuir artigu 250 kódigu prosesu penál mós deskreve, produsaun prova ne’e bainhira liu ona loron 30, la halo julgamentu mak konsidera prova ne’e lakon, tanba ne’e juiz sira ne’ebé kaer prosesu ba julgamentu kontinuasaun mezmu iha feria judisiáriu hodi kontinua nafatin,” hateten Afonso Carmona.
Tribunál Distritál Dili (TDD) hahú hosi janeiru to’o maiu, tinan ne’e, kazu krime ne’ebé finaliza hamutuk 494, kazu pendente 2054 no kazu foun hamutuk 518, totál kazu sira ne’e seidauk konta ho fulan juñu ho jullu.
Kazu sivíl ne’ebé finaliza durante janeiru to’o maiu hamutuk 89, kazu sivíl foun 112, no kazu sivíl pendente hamutuk 5109.
Jornalista : Nelson de Sousa