Díli, 27 Outubru 2026 — Sua Exelénsia Prezidente Tribunal de Recurso, Dr. Afonso Carmona, hamutuk ho Juízes Konselheirus no funsionárius Tribunál, presta homenajen ba saudozu Sebastião Rangel Gomes, iha Igreja Motael, Díli, nu’udar forma ida atu hato’o respeitu no fó omenajen ba nia kontribuisaun iha luta ba ukun-rasik-an Timor-Leste.
Saudozu Sebastião Gomes mak joven ida ne’ebé nia naran liga metin ho movimentu rezisténsia no luta povu Timor-Leste nian ba liberdade. Nia mate iha kalan 28 Outubru 1991, iha Igreja Motael, no nia mate sai parte importante husi memória istórika luta libertasaun nasionál Timor-Leste.
Akontesimentu iha Igreja Motael, ne’ebé envolve joven sira no movimentu rezisténsia, konsidera nu’udar parte husi konteksu istóriku ne’ebé liga ho manifestasaun 12 Novembru 1991 iha Semitériu Santa Cruz. Akontesimentu hirak-ne’e hatudu papel importante juventude nian iha luta ba liberdade no ukun-rasik-an.
Iha kontestu ne’e, iha apelu atu kontinua valoriza no preserva memória saudozu Sebastião Gomes nu’udar joven ida ne’ebé fó nia moris ba luta ba independénsia Timor-Leste.
“Eroi ida ne’ebé presiza ita valoriza no kontinua fó valór ba nia. Se la akontese 28 Outubru 1991 iha Motael, dalaruma 12 Novembru mós la akontese. Akontesimentu sira-ne’e provoka joven sira atu halo asaun, tanba sira haree ita-nia maluk ida ne’ebé ko’alia kona ba ukun rasik a’an,” nune’e mak mensajen ne’ebé hato’o kona-ba importánsia akontesimentu istóriku ne’e.
Omenajen ne’e sai hanesan símbolu respeitu no rekoñesimentu ba sakrifísiu saudozu Sebastião Rangel Gomes, no mós hanoin-fila fali ba responsabilidade jerasaun ohin nian atu preserva memória istórika, valoriza luta ba liberdade no transmite valór sira-ne’e ba jerasaun foun.