Viqueque, 30 Janeiru 2026 – Sua Exelénsia Presidente Tribunal de Recurso, Dr. Afonso Carmona, partisipa iha serimónia handover site Projetu Konstrusaun Edifísiu Tribunal Judisial Primeira Instánsia Viqueque, ne’ebé hala’o iha Suku Karaubalu, Munisípiu Viqueque.
Serimónia ne’e mos partisipa husi Komandante PNTL Munisípiu Viqueque, Reprezentante Presidente Autoridade Munisípiu Viqueque, Diretór Obras Públikas, Diretór Agrikultura, Diretór Interinu Terras no Propriedade, Delegasaun ADN, Diretór Kompañia Bonavide Unipessoal, Lda, Diretór Jerál Tribunal de Recurso, Sekretáriu Judisiál Tribunal de Recurso, Sekretáriu Judisiál Tribunal Judisial Primeira Instánsia Baucau, no Xefe Suku Karaubalu, hamutuk ho komunidade lokál.
Serimónia ida-ne’e destina ba entrega dokumentu legal konstrusaun edifísiu Tribunal Judisial Primeira Instánsia Viqueque ba Kompañia Bonavide Unipessoal, Lda, hanesan etapa importante iha implementasaun projetu konstrusaun refere.
Iha diskursu husi Komandante PNTL Munisípiu Viqueque, nia hateten katak durante ne’e justisa mak asuntu ne’ebé povo Viqueque hela iha difikuldade atu asesu, tanba limitasaun transporte no kondisaun finansial. Nia fó ezemplu katak iha kazu barak, sasin ka testamuña la bele partisipa iha julgamentu tanba tenke viajen ba Baucau ka Díli. Agora, ho presensa Tribunal iha Viqueque, justisa bele besik liu ba povo no sosiedade. Nia mos husu atu povo no sosiedade Viqueque bele fó kontribuisaun hodi suporta konstrusaun edifísiu Tribunal atu lao ho diak to’o remata.
Representante Presidente Autoridade Munisípiu Viqueque mos hato’o agradesimentu ba Governu Sentrál no ba Presidente Tribunal de Recurso, tanba presensa Presidente Tribunal de Recurso iha Viqueque konsidera hanesan sinal diak ida ba povo Viqueque atu bele asesu justisa ho fasilidade. Nia hateten mos katak iha tempu uluk, testamuña balu bele sai suspeitu ka la partisipa iha prosesu justisa tanba problema transporte no distánsia, ne’ebé afeta lalais prosesu julgamentu. Ho kria kondisaun foun ne’e, povo no sosiedade Viqueque agora bele asesu justisa ho diak liu.
Iha intervensaun, Presidente Tribunal de Recurso, Dr. Afonso Carmona, hateten katak entrega dokumentu legal ba konstrusaun edifísiu Tribunal presiza kooperasaun diak entre Governu Lokál no Governu Sentrál, atu garante servisu ne’ebé profisionál, transparente no justu. Nia subliña katak Tribunal sempre hala’o nia funsaun ho prinsipiu transparénsia no profisionalizmu hodi garante kualidade iha asesu justisa no hadia konfiansa povo ba instituisaun judisiál.
Presidente Tribunal de Recurso mos halo esplikasaun jerál kona-ba prosesu asesu ba Tribunal, no reafirma katak interese prinsipál Tribunal mak hakbesik justisa ba povo, liuliu ba komunidade iha Munisípiu Viqueque, liuhusi entrega dokumentu legal no implementasaun konstrusaun edifísiu Tribunal Judisial Primeira Instánsia.