Iha loron 01 Janeiru 2026, Sua Exelénsia Prezidente Tribunal de Recurso, Dr. Afonso Carmona, partisipa iha serimónia 25 anos aniversáriu transformasaun histórika FALINTIL ba Forças de Defesa de Timor-Leste (F-FDTL).
Serimónia refere hahú hosantamissa iha Igreja Balide, hanesan momentu relijiozu atu halo homenajen ba heróis sira ne’ebé foti papel importante iha luta libertasaun nasional. Hafoin missa, Sua Exelénsia kontinua partisipa iha depozisaun flores iha Semitériu Santa Cruz, nu’udar sinal respeitu no apresiasaun ba sakrifísiu ba mártires.
Depois husi ne’e, Sua Exelénsia partisipa mos iha tomada de posse dos Órgãos Sosiais Associação Nasional Militar F-FDTL. Atividade ne’e tuir mai ho lançamento livru intitula “Falur nia Lian (A Voz do Povo)”, no remata ho jantar confraternização.
Tomada de posse, lançamento livru no jantar confraternização hala’o hotu iha Palásiu Nobre Lahane.
Livru “A Voz do Povo”, obra husi Jeneral Falur, karakteriza hanesan obra koletiva husi kláse guerreiru sira ne’ebé foti responsablidade boot iha história Timor-Leste. Iha okaziaun ne’e, Professor Dr. Avelino Coelho hateten katak livru ida ne’e importante tebes atu le’e , tanba através livru ne’e povu bele kompriende pensamentu no valor sira husi guerreiru FALINTIL no F-FDTL.
Serimónia ne’e sai hanesan momentu importante atu hametin unidade, memória histórika no apresiasaun ba kontribuisaun F-FDTL iha dezenvolvimentu no deféza Estadu Timor-Leste.