Iha loron 03 fulan Fevereiru tinan 2026, Sua Exelénsia Prezidente Tribunal de Recurso no mos Prezidente Konsellu Jerál Sentru Formasaun Jurídika no Judisiária (CFJJ), Dr. Afonso Carmona, partisipa iha Reuniaun Extraordinária Konsellu Geral CFJJ.
Reuniaun ne’e realiza iha edifísiu prinsipál Ministériu Justisa, iha Colmera, ho objetivu atu diskute no delibera asuntu sira ne’ebé relasiona ho planeamentu estratéjiku, dezenvolvimentu institusionál no fortaleseimentu sistema formasaun jurídika no judisiária iha Timor-Leste.
Na qualidade de Prezidente Konsellu Geral CFJJ, Sua Exelénsia Dr. Afonso Carmona partisipa iha reuniaun ne’e tuir dispostu iha Artigu 10.º, n.º 1 no n.º 3, alínea a), husi Dekretu-Lei n.º 11/2020, loron 25 fulan Marsu, ne’ebé regula estrutura, organizasaun no funsionamentu Sentru Formasaun Jurídika no Judisiária.
Tuir dispozisaun legal refere, Prezidente Konsellu Geral iha kompeténsia atu konvoka no preside reuniaun Konsellu Jerál, inklui reuniaun extraordinária, hodi asegura implementasaun politika formasaun ne’ebé efisiente no kontinua ba profisionál sira iha área direitu no justisa.
Partisipasaun Sua Exelénsia Dr. Afonso Carmona iha reuniaun ne’e hatudu kompromisu Tribunal de Recurso hodi kontinua apoia esforsu sira atu hasae kualidade no kapasidade rekursus umanu iha sistema judisiáriu nasionál.