Díli, 28 Janeiru 2026 —
Sua Exelénsia Presidente Tribunal de Recurso, Dr. Afonso Carmona, partisipa iha visita ofisiál, sesaun plenária no jantar ofisiál resesaun ho Sua Exelénsia Primeiru-Ministru Austrália, Anthony Albanese, ne’ebé realiza iha visita ofisiál ba Timor-Leste.
Visita ofisiál ne’e sai momentu importante atu hametin relasaun diplomátika no koperasaun bilaterál entre Austrália no Timor-Leste. Iha okazia ne’e, reafirma sira-nia kompromisu atu kontinua hasae koperasaun ba nivel estratéjiku, ho énfaze ba rezultadu ne’ebé sustentável.
Koperasaun bilaterál ne’e inklui área prioridade sira hanesan diversifikasaun ekonómika, kriasaun empregu dignu, transferénsia teknolójia ne’ebé efetivu, no respeitu ba prioridade soberanu Timor-Leste nian.
Durante diskusaun sira iha konteksu visita ofisiál, Austrália no Timor-Leste hatudu parseria ne’ebé metin iha setór lima prinsipál, nomeadamente koperasaun seguransa, dezenvolvimentu ekonómiku, saúde, edukasaun no ligasaun komunitária.
Relasaun amizade no solidariedade entre povu Timor-oan no povu Austrálianu konsidera hanesan fundamentu importante atu promove paz, estabilidade no dezenvolvimentu iha rejiaun.
Partisipasaun Sua Exelénsia Presidente Tribunal de Recurso reflete envolvimentu instituisaun judisiál iha esforsu estadu nian atu hadia no hametin relasaun internasionál.