Da Nang, Vietname, 9–12 Outubru 2026 – Sua Exelénsia Prezidente Tribunal de Recurso, Dr. Afonso Carmona, partisipa iha The 4th ASEAN–China Justice Forum, ne’ebé hala’o iha Da Nang, Repúblika Sosialista Vietname, husi loron 9 to’o 12 Outubru 2026.
Iha fórum internasionál ida-ne’e, Sua Exelénsia Prezidente Tribunal de Recurso mós aprezenta diskursu ho tópiku “Cooperation in Resolving Cross-Border Criminal, Civil and Commercial Disputes in the Digital Era”, ne’ebé signifika kooperasaun atu rezolve disputa kriminál, sivíl no komersiál transfronteirisa iha era dijitál.
Tópiku ne’e foka ba importánsia kooperasaun judisiária entre nasaun sira atu responde ba dezafiu sira iha rezolusaun kazu no disputa ne’ebé envolve liu nasaun ida, liuliu iha kontestu dezenvolvimentu teknolojia dijitál no interasaun transfronteirisa ne’ebé kontinua aumenta.
Fórum ne’e mós sai nu’udar plataforma importante ba troka esperiénsia, koñesimentu no prátika di’ak entre instituisaun judisiária sira husi nasaun ASEAN no Repúblika Populár Xina, ho objetivu atu hametin kooperasaun judisiária no promove mekanizmu efetivu ba rezolusaun disputa transfronteirisa.
Partisipasaun no kontribuisaun Sua Exelénsia Prezidente Tribunal de Recurso iha fórum ne’e hatudu envolvimentu Timor-Leste iha diálogu judisiáriu internasionál, no mós oportunidade atu hametin relasaun kooperasaun ho instituisaun judisiária sira iha rejiaun.
Liu husi partisipasaun iha fórum ida-ne’e, Tribunal de Recurso kontinua apoia esforsu sira atu dezenvolve kooperasaun judisiária, promove troka koñesimentu no responde ba dezafiu justisa iha era dijitál, ho konsiderasaun ba importánsia estadu direitu no asesu ba justisa.