Dili, 12 Juñu 2026 — Sua Exelénsia Prezidente Tribunal Rekursu partisipa iha serimónia lansamentu Revista Ministeriu Públiku Edisaun I, ne’ebé realiza iha Sala Reuniaun Procuradoria-Jerál da República, Kolmera, Dili
Serimónia lansamentu ne’e marka ho prezensa reprezentante institusionál sira iha setór justisa no orgaun sira ne’ebé iha papél importante iha prosesu administrasaun justisa iha Timor-Leste.
Iha Diskursu, Sua Exelénsia Procurador-Geral da Repúblika hatete katak Revista Ministeriu Públiku ne’e la’ós deit sai hanesan meiu atu hato’o informasaun kona-ba atividade no servisu instituisaun nian, maibé mos iha finalidade pedagójika no sívika hodi fó esplikasaun kona-ba kompeténsia, knaar no responsabilidade orgaun Ministeriu Públiku ne’ebé estabelese ona.
Tuir nia diskursu, publikasaun ida ne’e mos sai hanesan instrumentu atu fasilita asesu ba lei no justisa, hodi hametin konsiénsia públika katak asesu ba justisa no respeitu ba direitu fundamentál sidadania mak parte importante iha konstrusaun Estadu de Direitu.
Sua Excelénsia Procurador-Geral da Repúblika hatutan katak esforsu ida ne’e kontribui hodi konsolida konfiansa públiku iha prosesu investigasaun no servisu Ministeriu Públiku, ne’ebé iha mandatu hanesan garante legalidade Demokrátika no defende valores fundamentál sira iha sosiedade.
Iha okaziaun ne’e, Procurador-Geral da Repúblika mos hato’o apresiasaun no agradesimentu ba Sua Exelénsia Prezidente Tribunal Rekursu, diretór sira, orgaun polísia kriminál no entidade sira seluk ne’ebé kontribui hamutuk liu husi diálogu no kolaborasaun permanente ho Ministeriu Públiku.
Nia hatete katak kooperasaun entre instituisaun sira ne’e importante tebes atu hametin sistema justisa no asegura implementasaun Estadu de Direitu iha Timor-Leste.
Lansamentu Revista Ministeriu Públiku Edisaun I ne’e mos sai hanesan momentu ida atu rekoñese kontribuisaun ema hotu ne’ebé envolve iha prosesu preparasaun no realizasaun publikasaun ida ne’e, hodi hatudu komitmentu Ministeriu Públiku nu’udar instituisaun ne’ebé dinamiku no komprometidu ho servisu públiku.
Revista Ministeriu Públiku la’ós deit instrumentu komunikasaun institusionál, maibé mos sai hanesan ponte entre sidadaun no justisa, hodi aproxima informasaun jurídika ba públiku no hatudu ho klaru no rigor papel Ministeriu Públiku iha konstrusaun Estadu de Direitu.
Ho publikasaun ida ne’e, hein katak Revista Ministeriu Públiku bele kontribui atu promove koñesimentu, transparénsia no partisipasaun sívika, hodi hametin tan konfiansa sidadaun sira ba instituisaun justisa no orgaun sira hotu ne’ebé iha papél iha prosesu administrasaun justisa.