YOGYAKARTA, 16 NOVEMBRU 2026

Sua Exelénsia Prezidente Tribunal Rekursu, Dr. Afonso Carmona.S.H, hamutuk ho membru (IV) husi konselu Auditoria Repúblika Indonesia  BPK (Badan Pemeriksa Keuangan)Dr. Cand. Khaidir Abdurrahman, S.I.P., M.A.P., CRGP, loke ofisialmente abertura ba programa formasaun internasionál ho tema “International Training on Auditing Sustainable and Resilient Energy Systems”, ne’ebé hala’o iha salaun  BPK, Yogyakarta, Repúblika Indonézia, iha loron 16 Novembru 2026.

Iha ninia intervensaun, Sua Exelénsia Prezidente Tribunal Rekursu hato’o katak inisiativa formasaun internasionál ida-ne’e reprezenta dezenvolvimentu importante ida hodi konkretiza no haforsa komprensaun, kompromisu no kooperasaun institusionál ne’ebé estabelese ona liuhusi asinatura Memorandu Entendimentu (Memorandum of Understanding – MoU) entre BPK Repúblika Indonézia no Instituisaun Supremu Kontrolu Estadu Timor-Leste, ne’ebé hala’o ona fulan balu liubá iha Atambua, Indonézia.

Sua Exelénsia mós enfatiza katak auditoria ho kualidade la’ós de’it iha objetivu atu identifika falla, sala no irregularidade sira, maibé liuliu tenke kontribui ho efetivu ba hadi’a sistema governasaun, hametin responsabilizasaun no asegura katak rekursu públiku sira uza ho efisiente, efetivu no transparente, atu bele fó benefísiu ne’ebé máximu ba sosiedade.

Aleinde ne’e, Sua Exelénsia subliña katak liuhusi fórum internasionál ida-ne’e, partisipante hotu, liuliu partisipante sira husi Timor-Leste, iha oportunidade atu hasa’e koñesimentu, dezenvolve kapasidade profisionál no téknika, no fahe esperiénsia kona-ba prátika auditoria iha área sistema enerjia sustentável no reziliente.

Partisipasaun no realizasaun formasaun ida-ne’e mós sai hanesan manifestasaun konkretu husi kompromisu kooperasaun entre instituisaun kontrolu superiór rua, hodi kontinua promove troka koñesimentu, haforsa kapasidade institusionál no dezenvolve prátika auditoria ne’ebé kontribui ba transparénsia, boa governasaun no jestaun rekursu públiku ne’ebé orientadu ba interese no benefísiu povu nian.