Iha loron 18 fulan Novembru tinan 2026, Tribunal de Recurso, Câmara de Contas no Conselho Superior da Magistratura Judicial hala’o enkontru bilateral ho reprezentante husi Pro-Just, iha Tribunal de Recurso, Caicoli, Dili.
Enkontru ne’e lidera husi Juiz-Secretáriu do Conselho Superior da Magistratura Judicial, Dr. Yudi Pamukas, hamutuk ho Koordenadora Pro-Just, Dra. Elisa Samuel Boerekamp.

Enkontru bilateral ne’e iha objetivu atu aprezenta programa Pro-Just, inklui nia objetivu, rezultadu ne’ebé hein atu alkansa no estrutura governasaun; atualiza dezafiu sira ne’ebé identifika ona durante misaun konsultiva iha tinan 2024; halibur prioridade husi instituisaun judisiária sira ba elaborasaun Planu Asaun Nasionál; no prepara Workshop Tékniku ne’ebé sei realiza iha loron 19 Novembru, nune’e mós enkontru dahuluk Komité Koordenasaun Nasionál, ne’ebé sei hala’o iha loron 20 Novembru 2026

Pro-Just, iha ninia síntese, objetivu jerál atu promove dame, justisa no Estadu de Direitu iha Países Africanos de Língua Oficial Portuguesa no Timor-Leste (PALOP-TL).
Enkuantu, objetivu espesífiku programa ne’e mak atu hametin efikásia husi kadeia justisa kriminál iha prevensaun no kombate ba krime korrupsaun, brankeamentu kapitál no krime organizadu, ho atensaun espesífika ba tráfiku droga.
Enkontru bilateral ne’e sai nu’udar oportunidade importante atu hametin kooperasaun no diálogu institusionál entre Pro-Just no instituisaun judisiária sira, liuhusi identifikasaun prioridade no dezafiu sira, hodi kontribui ba sistema justisa no hametin Estadu de Direitu iha Timor-Leste.
