DILI, 05 outubru 2021 (TATOLI)-Prezidente Tribunál Rekursu (PTR), Deolindo dos Santos relata serbisu Tribunál nian ba Prezidente Repúblika (PR), Francisco Guterres ‘Lú-Olo’.
“Reuniaun ho PR ne’e hafoin féria judisiál hosi 01 agostu to’o 15 setembru, nune’e agora serbisu komesa normál juís sira komesa haree fila-fali prosesu ne’ebé idaidak iha,” Deolindo dos Santos, hateten hafoin ramata sorumutu ho Xefe Estadu, iha edifísiu Palásiu Prezidensiál, Aitarak Laran, tersa ne’e.
PTR la lembra númeru detallu kazu hira maka Tribunál atende durante féria judisiál, maibé atende de’it prosesu ho karaktér urjénsia hanesan primeiru interrogatóriu, arguidu prezu, prosesu sumáriu, providénsia kautelár, no prosesu kontinuasaun atu asegura prova labele lakon.
Alende, Deolindo dos Santos, informa ba PR kona-ba serbisu jestaun no akompañaentu TR nian ba diploma sira ne’ebé agora deskute iha Parlamentu Nasionál (PN),ne’ebé servisu hotu lao di’ak.
“Prezidente apresia ho di’ak no enkoraza nafatin atu bele servisu di’ak liután atu bele prienxe justisa ba sidadaun” nia dehan
PTR, Deolindo dos Santos,seidauk atualiza servisu Tribunál liga ba prosesu kazu sira hahú iha 16 setembru to’o agora tanba foin retoma normál no sei atualiza tempu tuirmai.
Maibé antes ne’e to’o iha loron 31 agostu tinan ne’e, evolusaun pozitivu ne’ebé iha diminuisaun prosesu signifikativu liuliu iha Tribunál Distritál Dili (TDD),iha prosesu krime pendente 3000-resin redúz ba 1700-resin no sivíl hosi 2000-resin redúz ba 700-resin.
No Tribunál Distritál Baucau (TDB), rejista prosesu krime pendente 1000-resin agora tun ba 500-resin no sivíl iha 300-resin tun ba 200-resin,ho iha Tribunál Rekursu (TR), Tribunál Suai no Óe-cusse maka iha prosesu naton.
“Ida ne’e rezultadu pozitivu no juís sira halo esforsu nafatin atu aselera prosesu hotu lais liután,” nia hateten
Jornalista:Nelson de Sousa