Díli, 10 Juñu 2026 – Sua Exelência Presidente do Tribunal de Recurso, Dr. Afonso Carmona, partisipa iha cerimónia comemorativa ba Dia de Portugal, de Camões no das Comunidades Portuguesas, hanesan representante ida husi órgaun soberania Estadu Timor-Leste.
Iha eventu ne’e, marka mos prezensa husi Sua Excelência Presidente da República, Sua Excelência Presidente do Parlamento Nacional, membru Governu, korpu diplomátiku no konvidadu ilustre sira seluk, inklui Sr. Lere Anan Timur.
Partisipasaun husi Sua Exelência Presidente do Tribunal de Recurso reflete relasaun amizade no kooperasaun di’ak entre Timor-Leste no Portugal, nomós kompromisu atu kontinua hametin valor sira democracia, Estadu de Direitu no ligasaun istórika no kulturál entre nasaun rua ne’e.
Cerimónia ne’e realiza ho ambiente solene no respeitu, ho objetivu atu selebra patrimóniu istóriku, kulturál no linguístiku ne’ebé une povu Timor-Leste no Portugal, nomós valoriza kontribuisaun komunidade portuguesa iha mundu tomak.
Partisipasaun husi lideransa sira husi órgaun soberania Estadu nian hatudu importánsia relasaun bilateral entre Timor-Leste no Portugal, ne’ebé durante ne’e kontinua dezenvolve iha área oioin, inklui justisa, edukasaun, administrasaun públika no dezenvolvimentu institusionál.