Sua Exelénsia Prezidenti Tribunal de Recurso Partisipa Serimónia Kondekorasaun ho Grande Colar Ordem Timor-Leste no Palestra Presidensiál Série IV husi Sua Exelénsia Prof. Dr. (H.C.) Megawati Soekarnoputri

Díli, 09 Julho 2026 – Sua Exelénsia Prezidenti Tribunal de Recurso, Dr. Afonso Carmona, partisipa iha Serimónia Kondekorasaun ho Grande Colar Ordem Timor-Leste, ne’ebé Estadu Timor-Leste fó ba Sua Exelénsia Prof. Dr. (H.C.) Megawati Soekarnoputri, no mos iha Palestra Presidensiál Série IV ne’ebé hato’o tuir serimónia kondekorasaun, no kontinua ho almosu ofisiál.

Serimónia refere realiza iha Salaun China, Palásiu Prezidente Nicolau Lobato, Díli, ho prezensa husi Sua Exelénsia Prezidenti Repúblika Demokrátika Timor-Leste, Sua Exelénsia Primeiru-Ministru, Sua Exelénsia Prezidenti Parlamentu Nasionál, membru Governu sira, lideransa instituisaun sira, korpu diplomátiku, no konvidadu importante sira seluk.

Iha  Palestra Presidensiál Série IV, Sua Exelénsia Prof. Dr. (H.C.) Megawati Soekarnoputri ko’alia kona-ba importánsia hametin relasaun estratéjiku entre Timor-Leste no Indonézia. Nia hateten katak nasaun rua ne’e iha oportunidade boot atu dezenvolve área kresimentu estratéjiku ida ne’ebé bele promove dezenvolvimentu no prosperidade hamutuk, liu liu iha rejiaun Nusa Tenggara Timur (NTT), Díli no Papua, hodi habelar benefísiu ba povu iha área hirak ne’e.

Iha oportunidade ne’ebá, Sua Exelénsia Megawati mos salienta katak kooperasaun entre nasaun sira tenke bazeia ba komprensaun mútua, solidariedade no responsabilidade hamutuk. Nia dehan katak polítika la’ós deit kona-ba ukun ka poder, maibé kona-ba oinsá atu kria moris hamutuk ne’ebé harmoniozu no promove bem-estar povu. Tuir nia, luta polítika tenke sai instrumentu atu serve interese povu no kontribui ba dezenvolvimentu nasaun.

Nune’e mos, Sua Exelénsia Megawati fó mensajen motivasaun ba feto Timor-Leste sira, hodi enfatiza katak papel feto iha sosiedade no iha mundu polítika importante tebes. Hateten katak feto la’ós deit iha responsabilidade doméstika, maibé iha kapasidade atu sai lider no kontribui ativamente iha prosesu dezenvolvimentu nasaun. Tanba ne’e, Sua Exelénsia Megawati enkoraja feto sira atu kontinua estuda didi’ak, dezenvolve kompeténsia no prepara an atu sai lider forte no responsavel iha futuru Timor-Leste.