Tribunal de Recurso no Aitula Fuel, Lda. Selebra Kontratu Fornesimentu Kombustível ba Veíkulu Tribunais

Iha loron 12 fulan Maiu tinan 2026, Tribunal de Recurso no Aitula Fuel, Lda. selebra kontratu ba fornesimentu kombustível destinadu ba veíkulu sira Tribunál nian.

Kontratu refere realiza liu husi prosedimentu solicitasaun kotasaun, tuir dispozisaun sira iha Artigu 37 no Artigu 81, númeru 2, husi Decreto-Lei númeru 1/2025, loron 08 Janeiru, kona-ba Kódigu Aprovisionamentu. Prosedimentu ne’e hetan autorizasaun husi despaxu Sua Exelénsia Prezidente Tribunal de Recurso, loron 04 Marsu 2026, exaradu iha Informasaun númeru 04/Adm.DNGFP/TR/III/2026.

Ajudikasaun no minuta kontratu mos aprova ona tuir despaxu Sua Exelénsia Prezidente Tribunal de Recurso,loron 15 Abril 2026, ne’ebé exaradu iha relatóriu jurí nian.

Iha selebrasaun kontratu refere, Sua Exelénsia Prezidente Tribunal de Recurso mos hato’o nia intervensaun, ne’ebé hatete katak “kombustível nu’udar meiu importante ida atu suporta servisu instituisaun nian, tamba instituisaun ida bele hala’o nia servisu ho di’ak bainhira iha apoiu lojístiku ne’ebé sufisiente”.

Liu husi akordu refere, Aitula Fuel, Lda. bele fornese kombustível ba Tribunal, hanesan forma ida husi koperasaun entre Estadu no entidade privada hodi garante Kontinuidade servisu institusionál sira.

Selebrasaun kontratu refere realiza iha edifísiu Tribunal de Recurso, Caicoli, Dili.