DILI, 27 janeiru 2021 –Prezidente Tribunál Rekursu, Deolindo dos Santos, hateten Tribunál kontinua hala’o julgamentu movel hodi lori justisa hakbesik liután ba povu.
Deolindo dos Santos, la esplika detallu kona-ba númeru prosesu kazu hira mak Tribunál Distritál Dili, Tribunál Distritál Baucau, Tribunál Distritál Suai no Tribunál Distritál RAEOA realiza hodi hala’o julgamentu movel iha 2020 tanba la lembra, maibé iha atividade julgamentu movel iha efetividade no rezultadu ho pasu pozitivu hodi kontinua redús kazu pendente no lori justisa hakbesik liután ba povu.
“Julgamentu movel tinan ida liubá ita la’o forma ne’ebé di’ak no agora daudaun komesa lao fila-fali ona hanesan iha Suai no Baucau,” Prezidente Tribunál Rekursu, Deolindo dos Santos, hateten ba Agência TATOLI iha Parlamentu Nasionál, kuarta ne’e.
Nia hatutan, 2021 prevee ona orsamentu liuhosi bens servisu hodi atende ba atividade operasionál julgamentu movel.
“Kona-ba totál orsamentu hira mak aloka ladún lembra montante, maibé operasionál bele korresponde hodi hala’o kontinua julgamentu movel nian ba Tribunál sira hotu,’’ Deolindo dos Santos hateten.
Jornalista : Nelson de Sousa
Editór : Francisco Simões