Díli, 11 Maio 2026 — Tribunal de Recurso hamutuk ho PT. Perentjana Djaja realiza Kick-Off Meeting kona-ba aprezentasaun inísiu Detailed Engineering Design (DED) ba projetu konstrusaun edifísiu Supremu Tribunal de Justisa, ne’ebé sei hari’i iha área Caicoli-Vera Cruz, Munisípiu Díli.

Enkontru ida ne’e partisipa husi Sua Exelénsia Prezidente Tribunal de Recurso, Diretor Jerál Tribunal de Recurso, Diretor Jerál DGHU-MPO, Diretor Nasionál Laboratóriu MOP no Diretor Ezekutivu Ajénsia Dezenvolvimentu Nasional (ADN), no mós ekipa téknika sira husi kompañia PT. Perentjana Djaja.

Iha reuniaun refere, kompañia PT. Perentjana Djaja aprezenta konseitu no dezeñu inisiál sira kona-ba projetu edifísiu Supremu Tribunal de Justisa. Projetu ida ne’e sei dezenvolve iha área Caicoli, Vera Cruz, ne’ebé durante ne’e identifika hanesan área ne’ebé dala barak sofre inundasaun bainhira tempu udan.

Iha ninia intervensaun, Diretor Jerál Obras Públikas subliña katak aspetu tékniku no kondisaun rai tenke sai konsiderasaun prinsipál iha prosesu dezeñu projetu refere. Nia hateten katak kompañia presiza halo estudu kle’an kona-ba kondisaun Jeográfika no risku inundasaun iha área ne’e, atu garante seguransa no sustentabilidade edifísiu iha futuru.

“Infraestrutura ida ne’e utiliza orsamentu Estadu ne’ebé mai husi povu, tamba ne’e presiza halo ho kualidade no responsabilidade. Ita hotu presiza kontribui ideia no servisu hamutuk atu bele hari’i Supremu Tribunal de Justisa ida ne’ebé diak ba jerasaun agora no futuru,” hatete Diretor Jerál Obras Públikas.

Iha oportunidade hanesan, Sua Exelénsia Prezidente Tribunal de Recurso mós hato’o preokupasaun kona-ba kondisaun área. Nia husu ba ekipa tékniku atu hare didiak aspetu dezenhu no sistema preven-saun inundasaun, tanba área Caicoli durante ne’e hetan inundasaun bainhira udan boot.

Husi parte kompañia, reprezentante PT. Perentjana Djaja esplika katak dezeñu ne’ebé aprezenta seidauk final no agora dadaun foin tama  iha fase dahuluk, fase ida ne’e importante atu simu kontribuisaun no ideia husi entidade relevante sira, atu nune’e bele produz dezeñu ne’ebé diak liu no responde ba nesesidade instituisaun nian.

Kompañia mós manifesta esperansa katak depois Kick-Off Meeting ida ne’e, sei kontinua halo diskusaun no ajustamentu tékniku sira antes aprezenta fila fali dezenhu final ne’ebé kompletu no apropriadu ba projetu edifísiu Supremu Tribunal de Justisa.