Iha loron 19 fulan Maio tinan 2026, Juízes Conselheiros Tribunal de Recurso partisipa iha missa agradesimentu ba Komemorasaun Aniversáriu ba Restaurasaun Independénsia Timor-Leste ba dala 24, ne’ebé realiza iha paróquia Imaculada Conceição da Virgem Santa maria Sé Catedral, Dili.
Partisipasaun iha missa refere nu’udar forma agradesimentu no rekonesimentu ba luta no sakrifísiu ne’ebé povu Timor-Leste no heróis sira halo hodi hetan independénsia no soberania nasaun nian.
Hafoin remata missa, Juízes Conselheiros sira kontinua ba Semitériu Santa Cruz hodi tau ai-funan no presta omenajen ikus ba heróis no mártires sira ne’ebé fo ona sira-nia moris ba libertasaun no independénsia Timor-Leste.
Serimónia ne’e hala’o ho atmosfera ne’ebé nakonu ho emosional no sentimentu patriotizmu, ne’ebé hatudu unidade, respeitu no gratidaun kle’an ba luta no sakrifísiu heróis no mártires sira. Iha okaziaun ne’e, Juízes Conselheiros, líderes Estadu, veteranu no komunidade sira hamutuk fó respeitu aas no omenajen ba heróis no mártires sira ne’ebé ho korajen no determinasaun kontribui boot ba luta ukun-an no independénsia Timor-Leste.
Momentu ne’e sai hanesan oportunidade ida atu fó onra ba memória heróis no mártires sira, no mos atu hametin espiritu patriotizmu, unidade no responsabilidade atu kontinua kontribui ba dezenvolvimentu Estadu de Direitu ida ne’e.