Díli, 03 Jullu 2026 – Sua Exelénsia Presidente Tribunal de Recurso, Dr. Afonso Carmona, partisipa iha Audiénsia Públika ne’ebé organiza husi Komisaun A husi Parlamento Nacional, atu trata no diskute Projetu Lei n.º 17/VI (3.ª) kona-ba Sétima Alterasaun ba Kódigu Penal, ne’ebé aprova liuhosi Dekretu-Lei n.º 19/2009, loron 8 Abril, bazeia ba autorizasaun lejislativa ne’ebé Lei n.º 13/2008, loron 13 Outubru, fó ba Governu.
Audiénsia públika ne’e hetan partisipasaun husi Diretora husi Judicial System Monitoring Programme (JSMP), reprezentante husi HAK Association, Defensoria Públika, Ministériu Públiku, no membru Deputadu sira husi Komisaun A, ne’ebé hala’o prosesu rona pendente no kontribuisaun husi entidade relevante sira.
Iha oportunidade ne’e, S.E. Presidente Tribunal de Recurso la’ós deit partisipa iha audiénsia, maibé mós aprezenta diretamente pareser no hanoin jurídiku husi Tribunal de Recurso kona-ba Projetu Lei refere. Iha nia intervensaun, Sua Excelénsia hato’o observasaun no rekomendasaun sira ne’ebé konsidera importante atu aumenta klaridade norma penal sira, garante seguransa jurídika, no haforsa efetividade implementasaun Kódigu Penal iha prática judisiária.
Pareser ne’ebé aprezenta husi Tribunal de Recurso bazeia ba esperiénsia tribunál sira iha aplikasaun lei durante prosesu julgamentu, ho objetivu atu fó kontribuisaun téknika-jurídika ba Parlamentu Nasional hodi kontiudu Projetu Lei antes aprovasaun final.
Durante diskusaun, partisipante sira mós fó sira-nia hanoin, observasaun no sujestaun sira kona-ba proposta alterasaun ne’ebé sei halo ba Kódigu Penal, atu garante katak mudansa sira ne’e bele responde ho efetivu ba dezafiu jurídiku no sosiál sira ne’ebé Timor-Leste hasoru atualmente.
Audiénsia públika ne’e reflete importánsia diálogu entre órgaun soberania, instituisaun justisa no sosiedade sivíl sira iha prosesu elaborasaun no lejislasaun nasional, atu asegura katak lei sira ne’ebé sei aprova iha fundamentu jurídiku forte no responde ba interese públiku.
S.E. Prezidente Tribunal de Recurso Partisipa iha Audiénsia Públika Kona-ba Projetu Lei Sétima Alterasaun ba Kódigu Penal