Dili, 7 Setembru 2026 — Sua Exelénsia Presidente Tribunal de Recurso, Dr. Afonso Carmona, akompaña husi Juízes Konselheirus, Juíz Administrador, estrutura no funsionárius Tribunal de Recurso, ohin presta homenagem ikus ba restus mortais Reverendísimu Preladus nain haat iha Tasi Tolu, Dili.
Preladus nain haat ne’ebé simu omenagem ikus husi Presidente Tribunal de Recurso no delegasaun Tribunal mak hanesan Dom Jaime Garcia Goulart, Dom José Joaquim Ribeiro, Monsenhor Martinho da Costa Lopes no Dom Alberto Ricardo da Silva.
Presensa husi Presidente Tribunal de Recurso, Juízes no funsionárius iha Tasi Tolu ne’e reprezenta forma ida husi rekonesimentu no apresiassaun Tribunal de Recurso ba kontribuisaun boot ne’ebé Preladus sira presta ba dezenvolvimentu Igreja Katólika no Nasaun Timor-Leste, liu husi sira-nia moris, servisu pastoral no dedikasaun ba povu.
Iha oportunidade ne’e, Presidente Tribunal de Recurso, Dr. Afonso Carmona, hatete katak prezensa husi estrutura no funsionárius tomak Tribunal de Recurso iha loron ida-ne’e nu’udar forma ida atu fó omenagem no respeitu ikus ba Preladus na’in haat, ne’ebé durante sira-nia moris hatudu domin boot ba Igreja no ba povu Timor-Leste.
Tuir Dr. Afonso Carmona, servisu no dedikasaun Preladus sira nian sai parte importante husi istória no dezenvolvimentu Igreja iha Timor-Leste. Liu husi sira nia servisu pastoral, Preladus sira kontinua hatudu domin Maromak nian ba povu Timor, ne’ebé sira konsidera nu’udar rai ida ne’ebé sagrada ka Terra Santa. Iha biban hanesan Dr. Aafonso Carmona mos hakerek mensajem iha livro Presta Omenagem nian.
Omenagem ne’e mos sai símbolu ida husi respeitu no gratidaun ba servisu, dedikasaun no kontribuisaun Preladus na’in haat durante sira nia moris, liu liu iha servisu ba Igreja no povu Timor-Leste.