Ermera, 29 Julho 2026 – Sua Exelência Presidente Tribunal de Recurso, hamutuk ho Juízes Conselheiros, kontinua partisipa iha Serimónia Haloot Restus Mortais iha Jardim dos Heróis Fatuk Kero, Município Ermera.
Iha serimónia ne’e, Ministério ba Assuntu Kombatentes Libertação Nacional (MAKLN), hamutuk ho Autoridade Município Ermera, veteranu sira no komunidade lokal, ofisialmente finaliza ona prosesu haloot restus mortais hamutuk 5.244, ne’ebé koletivu ba urna 1.600.
Iha intervensaun, Ministro ba Assuntu Kombatentes Libertação Nacional, Sr. Gil da Costa Monteiro “Oan Soru”, hato’o agradese ba parte hotu ne’ebé fó apoiu no kontribuisaun másimu durante prosesu haloot restus mortais refere.
Ministru mos hato’o agradese espesial ba inan-aman sira, faluk sira no oan-kiak sira ne’ebé durante luta libertasaun nasional halo sakrifísiu boot, lakon sira nia família atu konsege ukun-an no liberdade ba povu Timor-Leste.
“Governu agradese espesial ba faluk no oan-kiak sira. Imi nia sakrifísiu, lakon imi nia aman, inan no laen hodi sosa ita nia liberdade, sei nafatin sai patrimóniu históriku ba nasaun ida ne’e. Restus mortais balun ita konsege haloot ona ohin, maibé Governu sei kontinua halo esforsu atu buka no haloot nafatin iha territóriu Timor-Leste tomak. Karik la kontinua buka, ruin ne’ebé meik sei sona ita,” dehan husi Sr. Gil da Costa Monteiro “Oan Soru”.
Iha biban hanesan, Tenente Jeneral Reformadu Lere Anan Timur, ne’ebé hanesan mos veteranu no partisipa iha serimónia refere, hateten katak serimónia ida ne’e iha valor históriku no moral ne’ebé boot tebes ba povu Timor-Leste. Nia husu ba sidadaun hotu atu valoriza luta no sakrifísiu ne’ebé mártires no kombatentes libertasaun nasional sira halo durante tempu okupasaun.
Lere Anan Timur hateten ,temki iha konsiderasaun no valorizasaun ba mártires sira la’ós deit husi liafuan, maibé tenke hatudu mos liu husi asaun no pratika.
“Valorizasaun ba mártires sira labele deit husi ibun-tutun. Tenke hatudu iha pratika. Ema ne’ebé la lakon família karik la sente laran susar hanesan sira ne’ebé lakon aman, inan ka membru família sira. Bainhira ita haree família sira ne’e, ita bele haree rasik sira nia tanis no moras laran tanba sakrifísiu ne’ebé sira hasoru,” dehan Tenente Jeneral Reformadu Lere Anan Timur.
Liu husi serimónia ida ne’e, Estadu Timor-Leste reafirma fila-fali nia kompromisu atu respeita, dignifika no valoriza sakrifísiu boot husi kombatentes libertasaun nasional no mártires sira ne’ebé dedika an tomak ba independénsia, soberania no liberdade povu Timor-Leste.
Serimónia ne’e hetan partisipasaun husi família restus mortais sira, Sua Exelênsia Presidente Tribunal de Recurso, Vice-Ministro do Comércio e Indústria, Juízes Conselheiros Tribunal de Recurso, Prezidenti CCLN husi municípiu hotu, Tenente Jeneral Falur Rate Laek, Jeneral Taur Matan Ruak, Tenente Jeneral Reformadu Lere Anan Timur membru Parlamentu Nasional, veteranu sira no konvidadu sira seluk.