Dili, 23 Setembru 2026 — Sua Exelénsia Prezidente Tribunal de Rekursu no Kamara de Kontas, Dr. Afonso Carmona, partisipa iha audisaun ho entidade relevante sira, kona-ba Projeto de Lei n.º 18/VI (3.ª) – Terceira Alteração ba Lei n.º 9/2011, loron 17 Agostu, ne’ebé aprova Orgânica Kamara de Kontas.
Audisaun ne’e realiza iha Parlamentu Nasional, nu’udar parte husi prosesu diskusaun no konsiderasaun ba alterasaun proposta ba Lei n.º 9/2011, ne’ebé regula estrutura no kompeténsia Kamara de Kontas.
Iha audisaun ne’e, Sua Excelénsia Prezidente Tribunal de Rekursu no Kamara de Kontas hato’o kontribuisaun no konsiderasaun institusionál kona-ba matéria sira relasiona ho Projeto de Lei refere, liuliu aspetu sira ne’ebé relevante ba funsaun, kompeténsia no papel Kamara de Kontas iha sistema kontrolu no fiskalizasaun finanseira públika.
Partisipasaun ne’e hatudu kompromisu Tribunal de Rekursu no Kamara de Kontas atu kontinua kontribui ba dezenvolvimentu no aperfeisuamentu kuadru jurídiku no institusionál, ho objetivu atu hametin transparénsia, responsabilidade no boa jestaun finanseira públika iha Timor-Leste.
Audisaun ne’e mos sai nu’udar oportunidade importante atu promove diálogu institusionál entre Parlamento Nasional no entidade relevante sira, iha prosesu elaborasaun no aperfeisuamentu lejizlasaun ne’ebé liga diretamente ho funsaun no responsabilidade Kamara de Kontas.