Maliana, 23 Setembru 2026 — Tribunal de Rekursu hala’o serimónia lansamentu fatuk dahuluk ba konstrusaun edifísiu Tribunal Judisiál Primeira Instánsia Maliana no Residénsia Juíz sira, iha Maliana, Munisípiu Bobonaro.

Serimónia ne’e marka etapa importante ida iha esforsu Tribunal de Rekursu atu kontinua     dezenvolve no hametin infraestrutura sistema judisiáriu iha Timor-Leste, hodi garante katak instituisaun judisiária sira iha espasu no infraestrutura ne’ebé apropriadu ba ezekusaun sira-nia funsaun.

Serimónia ne’e hetan prezensa hosi Sua Exelénsia Prezidente Tribunal de Rekursu, Dr. Afonso Carmona, hamutuk ho Prokuradór-Jerál Repúblika, reprezentante Defensoria Públika, Ministériu Públiku, Ministériu Planeamentu no Investimentu Estratéjiku, Komandante PNTL Munisípiu Bobonaro, Prezidente Autoridade Munisipál Bobonaro, Membru Konselhu Majistratura Judisial , Juíz Administradór Tribunal Judisiál Primeira Instánsia Suai, representante Prezidente CMCLN Veteranus Munisípiu Bobonaro no autoridade sira.

Partisipasaun mos inklui Administradór sira hosi Postu Administrativu neen iha Munisípiu Bobonaro, Xefe Suku sira, Xefe Aldeia sira, Lia-na’in sira, no Diretór Kompania Infraestrutura, hamutuk ho reprezentante no funsionáriu hosi instituisaun relevante sira.

Iha serimónia ne’e, Sua Exelénsia Prezidente Tribunal de Rekursu, Dr. Afonso Carmona, halo intervensaun, ne’ebé hato’o importánsia konstrusaun infraestrutura judisiária ne’e ba kontinuidade no melloramentu prestasaun servisu justisa, liuliu ba komunidade iha Munisípiu Bobonaro no área sira hale’u.

Sua Exelénsia Prezidente Tribunal de Rekursu, Dr. Afonso Carmona mos subliña nesesidade atu konstrusaun ne’e hala’o ho responsabilidade, tuir padraun tékniku no planeamentu ne’ebé determina ona, hodi asegura katak edifísiu ne’e bele responde ba nesesidade Tribunal Judisiál Primeira Instánsia Maliana no juíz sira iha sira-nia ezekusaun funsaun.

Além hosi intervensaun Sua Excelénsia Prezidente Tribunal de Rekursu, Diretór-Jerál Tribunal de Rekursu mos halo intervensaun, ne’ebé esplika aspetu relevante sira kona-ba konstrusaun no importánsia infraestrutura ne’e ba funsionamentu servisu judisiáriu.

Lansamentu fatuk dahuluk ne’e marka ofisiálmente inísiu konstrusaun Edifísiu Tribunal Judisiál Primeira Instánsia Maliana no Residénsia Juíz sira, ne’ebé espera bele kontribui ba kriasaun kondisaun servisu ne’ebé di’ak, seguru no apropriadu ba profisionál judisiáriu sira, no mos fasilita asesu komunidade ba justisa.

Ho konstrusaun infraestrutura ne’e, Tribunal de Rekursu reafirma kompromisu institusionál atu kontinua hametin sistema judisiáriu no hadi’a prestasaun servisu justisa, liuhosi dezenvolvimentu infraestrutura ne’ebé sustentável no responde ba nesesidade instituisaun no komunidade.