Iha loron 24 no 25 fulan Outubru tinan 2026, Sua Exelénsia Prezidente Tribunál Rekursu, Dr. Afonso Carmona, hamutuk ho Juízes Konselleiras sira, partisipa iha Missa Funeral ba kulminante mártir libertasaun nasionál nian, ne’ebé hala’o iha Jardim dos Heróis, Metinaro.
Partisipasaun Sua Exelénsia Prezidente Tribunál Rekursu, nu’udar reprezentante ida husi órgaun soberanu Estadu, hatudu respeitu no omenajen ba mártir sira ne’ebé sakrifika sira-nia moris iha luta ba ukun-rasik-an no libertasaun nasionál Timor-Leste nian.
Iha serimónia ne’e, Sua Exelénsia Prezidente Tribunál Rekursu entrega bandeira nasionál ba reprezentante família mártir sira, nu’udar símbolu respeitu, honra no rekonesimentu ba sakrifísiu ne’ebé mártir sira halo ba pátria.
Depois de serimónia missa funeral, Sua Exelénsia Prezidente Tribunál Rekursu hamutuk ho Juízes Konselleiras sira kontinua ho serimónia tau ai-funan iha rate mártir sira nian, nu’udar forma ida atu hato’o homenajen no hanoin fila-fali luta, korajen no sakrifísiu husi saudoso mártir sira ne’ebé kontribui ba ukun-rasik-an Timor-Leste nian.
Atividade ne’e reflete kompromisu Tribunál Rekursu, nu’udar órgaun soberanu Estadu, atu valoriza no preserva memória istórika, sakrifísiu no eransa luta libertasaun nasionál nian, ba jerasaun ohin no futuru.