Atambua, 24 Agostu 2026 — Sua Exelénsia Presidente Tribunal de Recurso, Dr. Afonso Carmona, vizita ofisial ba Pengadilan Negeri Atambua Kelas 1-B, ne’ebé simu husi Ketua Pengadilan Negeri Atambua Kelas 1-B, Yunius Manoppo, S.H., M.H.
Vizita ofisial ida-ne’e sai nu’udar oportunidade importante atu troka esperiénsia, kompartilla koñesimentu no fó hanoin ba malu kona-ba dezenvolvimentu no sistema judisiáriu entre Timor-Leste no Repúblika Indonézia.
Iha enkontru ne’e, Sua Exelénsia Presidente Tribunal de Recurso no Ketua Pengadilan Negeri Atambua Kelas 1-B diskute kona-ba papel no dezenvolvimentu instituisaun judisiária, ho objetivu atu hametin kooperasaun no relasaun di’ak entre instituisaun judisiária husi nasaun rua.
Iha okaziaun ne’ebá, Sua Exelénsia Presidente Tribunal de Recurso mos entrega souvenir ba Ketua Pengadilan Negeri Atambua Kelas 1-B, Yunius Manoppo, S.H., M.H., nu’udar símbolu amizade no komitmentu atu kontinua hametin relasaun di’ak entre Timor-Leste no Indonézia.
Além disso, Sua Exelénsia Presidente Tribunal de Recurso entrega mos livru ho títulu “Nahe Biti Bo’ot”. Livru ne’e konsidera nu’udar fonte importante atu ajuda komunidade judisiária sira komprende no halo komparasaun kona-ba kultura, tradisaun no valor sosiál ne’ebé iha ligasaun ho sistema justisa iha Timor-Leste.
Atividade ne’e taka ho foto hamutuk entre delegasaun Tribunal de Recurso Timor-Leste no Pengadilan Negeri Atambua Kelas 1-B, nu’udar símbolu amizade, kooperasaun no relasaun di’ak ne’ebé kontinua dezenvolve entre instituisaun judisiária husi nasaun rua.
Vizita ofisial Sua Exelénsia Presidente Tribunal de Recurso ba Pengadilan Negeri Atambua Kelas 1-B espera katak bele kontribui ba hametin liután kooperasaun judisiária, troka esperiénsia no relasaun amizade entre Timor-Leste no Repúblika Indonézia.